ကာကွယ်ရေးအသုံးစရိတ်ထက် ကျန်းမာရေး၊ ပညာရေး အသုံးစရိတ်ပိုရဖို့ကြိုးစားနေကြောင်း မကွေးဝန်ကြီးချုပ်ပြော

ကျန်းမာရေး ပညာရေး နှစ်ခုပေါင်းအသုံးစရိတ်ဟာ ကာကွယ်ရေးအသုံးစရိတ်ထက် ပိုမိုရရှိအောင် အမျိုးသားဒီမိုကရေစီအဖွဲ့ချုပ် အစိုးရလက်ထက်မှာ ကြိုးစားနေတယ်လို့ မကွေးတိုင်းဒေသကြီး ဝန်ကြီးချုပ် ဒေါက်တာ အောင်မိုးညိုက ဒီနေ့ ပြောလိုက်ပါတယ်။

ဒီနေ့ မကွေးမြို့ ထိန်ထိန်သာ ဟိုတယ်မှာပြုလုပ်တဲ့ မကွေးတိုင်းဒေသကြီး “အရပ်ဘက်အဖွဲ့အစည်းများ ငြိမ်းချမ်းရေးဖိုရမ်” မှာ ဒေါက်တာ အောင်မိုးညိုက ပညာရေး ကျန်းမာရေး အသုံးစရိတ်ဟာ ကာကွယ်ရေးအသုံးစရိတ်ကို ဘယ်တုန်းကမှ ကျော်တယ်လို့ မရှိခဲ့ကြောင်း၊ ဒီ ၂၀၁၈၊ ၂၀၁၉ ခုနှစ် ဘတ်ဂျက်မှာ အသုံးစရိတ် ကျော်မလိုဖြစ်ခဲ့ပေမယ့် ကာကွယ်ရေးဝန်ကြီးဌာနက ဘတ်ဂျက်တိုးတောင်းခဲ့ကြောင်းနဲ့ နောက်ပိုင်းမှာတော့ ကျော်နိုင်တယ်လို့ ကြားသိရကြောင်း ပြောပါတယ်။

မြန်မာနိုင်ငံဟာ ၂၀၁၀ ပြည့်နှစ် မတိုင်ခင်အထိ ကမ္ဘာပေါ်မှာ ကျန်းမာရေး ပညာရေး အသုံးစရိတ်အနည်းဆုံး နိုင်ငံတွေထဲမှာ ပါဝင်ပြီး စစ်အသုံး စရိတ်အများဆုံး နိုင်ငံစာရင်းမှာပါခဲ့တယ်လို့ ၀န်ကြီးချုပ်က ပြောပါတယ်။

NLD အစိုးရ လက်ထက်မှာ တဖြည်းဖြည်းတိုးတိုးတောင်းရင်းနဲ့ ကျန်းမာရေး ပညာရေးစရိတ်တွေ များများလာပြီး ကျောင်းတွေ ဆေးရုံတွေ ပိုမိုဆောက်လုပ်နိုင်တယ်လို့လည်း ပြောပါတယ်။

ဆေးရုံတွေမှာ ထောက်ပံနိုင်တာကြောင့် တိုင်းဆေးရုံမှာ လူနာပိုလက်ခံလာရပြီး မကွေးတိုင်းဆေးရုံကို ကုတင် ၅၀၀ ဆေးရုံဖြစ်အောင်ကြိုးစားနေတယ်လို့ ဆိုပါတယ်။

ပြည်တွင်းငြိမ်းချမ်းရေးရမယ်ဆိုရင် ငြိမ်းချမ်းရေးမှာသုံးနေတဲ့ ဘဏ္ဍာရေးနဲ့ လူစွမ်းအား အရင်းမြစ်တွေ ဖွံ့ဖြိုးရေးမှာသုံးမယ်ဆိုရင် အများကြီး တိုးတက်သွားမယ်လို့ ပြောပါတယ်။

ref ; RFA