A hlanah zu nupa an rak um i fanu dawhte pakhat an rak hrin. Aa dawh tuk caah vawlei cung i a tthawng bikmi Nika bawi vatter an duh. An pathum te cun Nika bawi sinah cun an va kal i, ''Vawlei cungah a tthawng bik tiah an nin ti caah kan fanu te he hin umhter kan in duh hna'' an va ti. Nika bawi nih cun, '' Kei cu vawlei cungah cun ka tthawng bik lo. Keimah nakin Minmei bawi a tthawng deuh. A duhduh in ka ceunak vialte a ka phenh khawh,'' tiah arak leh hna. Mah hnu cun Minmei bawi sinah an va kal tthan i a konglam cu an va chimh. ''Keimah nak in Thlitu bawi bawi pei a tthawn deuh cu. A duhnak kipah a ka chawih khawh,'' tiah arak leh ve hna. Thlitu bawi sinah cun an va kal diahmah tthan i, ''Kei cu ka tthawng bik lo. Keimah in Chuntlung bawi a ttawng deuh. Zeitluk in ka chem le zongah a chawih in ka chawih kho hrimhrim lo,'' tiah a leh hna.
Chuntlung bawi sinah cun an va le diahmah tthan i, ''Keimah cu ka tthawng bik lo. Keimah nakin Cawtum bawi a tthawng deuh. Amah nih a ka suk ah cun a celh in ka celh lo'', tiah a rak khirh ve hna. Cawtum bawi sinah cun an va lan hliahmah tthan i, ''Keimah cu ka tthawng bik lo. Keimah nak in Hnarphethri bawi a tthawng deuh. Chuk le cho ka duh lonak zongah a duhduh in a ka mer khawh,'' tiah arak leh ve hna. Hnarphethri sinah cun an va tli duahmah tthan i Hnarphethri bawi nih cun, '' Keimah cu ka tthawng bik nemman lo. Keimah nak in Zu bawi pei a tthawng deuh suaumau ko cu. a duh ahcun a duhduh in a ka ttei chum ko; a tuarh in ka tuar kho hrimhrim lo,'' tiah arak ti ve hna.
Ahnu bikah Zu bawi sinah cun an va le diahmah tthan i an ton. An fanu te cu arak duh ve caah an umhter colh hna. Adonghnak ah cun amah phun a si mi Zu an vat i nuam tein khua an sa tti hna.
Hi Tuanbia hi ''Lai Ca Cawnnak Tang Hnih'' chungin lakmi a si.
Comments