Siangpahrang pakhat nih a mipa sinah hitihin a chim. ''A fim bikmi ngakchia pathum ka sinah na ratpi hna lai i an duhmi phun thum cio ka pek hna lai,'' a ti. A mipa nih cun ngakchia pathum cu a kawl hna i a van ratpi hna.
Siangpahrang nih cun a pakhatnak ngakchiapa cu a auh i, ''Na duhmi phun thum in ka chim law kan pek lai,'' tiah a ti. Ngakchiapa nih cun, ''Maw Siangpahrang ka bawipa; Khuaibawi nih Rang an ni cit bantuk Rang ka duh ve. Suiluchin le aa dawhmi mi puan zong ka duh fawn,'' a ti. A duhmi vialte cu Siangpahrang pa nih cun a pek.
A pahnihnak ngakchiapa cu a auh ve i a duhmi cu a hal ve. ''Maw bawipa, kei cu rawl thawthaw ei ka duh. Thei thawthaw le pangpar dawhdawh an umnak dum ka duh i rian zeihmanh ttuan loin um ka duh,'' a ti. Siangpahrang nih cun a duhmi phun thum cu a pek dih ve.
A pathumnak hngakchiapa cu a auh i, '' Na duhmi phun thum in ka chim law kan pek lai,'' a ti. Ngakchiapa nih, ''Maw bawipa, kei cu ka nu le ka pa an tar cang i rian an ttuan khawh ti lo caah rianttuan loin an awlnak hnga ka duh. Kei cu misifak ka si caah a si a fakmi vialte cu bawmh ka duh hna. Cun mi dang caah mi tthahnem mi si ka duh fawn,'' tiah a hal.
Siangpahrang bawipa nih, ''Nannih vialte nih hi hngakchia hna pathum duhnak nan theih cang. Pakhatnak pa nih rum a duh. A pahnih pa nih um sawhsawh a duh. A pathumnak pa nih mi dang caah mi tthahnem mi si a duh. Cu a si caah a pahumnak pa cu ka sinah ka auh lai i ka umter lai. Hi hleiah Pathian nih amah duhnak cu a tlinter lai,'' tiah a chimh hna.
Cucaah nannih zong nan nu le nan pa zawn na ruah hna lai i misifak nan bawmh hna lai. Mi dang caah mitthahnem mi si nan i zuam lai.
Hi tuanbia hi, ''Lai Ca Cawnnak' Tang Hnih'' chungin lakmi a si.
Коментарі